T-Mobile телеком алыбы жуырда алғашқы дивидендтерді төлейді

T-Mobile US Inc. (NASDAQ: TMUS) телекоммуникациялық компаниясы 2023 ж. дивидендтерді төлей бастайды. Бәсекелестер дивидендтерді көптеген жылдар қатарынан төлеп келеді, және желтоқсаннан бастап T-Mobile да өз акцияларының құнын көтерудің осы тәсілін пайдаланатын болады.

T-Mobile 5,5 млн пайдаланушысы мен $68 млрд-тан астам жылдық түсімі  бар АҚШ-тағы ең ірі байланыс операторы болып табылады. Компания АҚШ-тың бүкіл дерлік аумағының 5G ұялы байланыспен жабылуын алғашқы болып қамтамасыз етті.

Жаңа байланыс стандарты T-Mobile-дың табысының артуын қамтамасыз етеді. Үшінші тоқсанда компанияның қызметтер сегментіндегі түсімі жылма жыл 4%-ке өсіп, $16 млрд-қа жуықтады. Енді T-Mobile жалпы табысының  80%-тен астамын қызметтерден алып отыр, бұл пайдалылыққа игі ықпал етеді. Үшінші тоқсанда пайда $2 млрд-тан асып жығылды, ал бір жыл бұрын ол $508 млн болған еді. Жылдың басынан қыркүйек айының соңына дейін T-Mobile $9,3 млрд еркін ақша ағынына ие болды— өсім жылма жыл 70%-ті құрады. 

Осылайша, қаржы көрсеткіштері мен оң даму серпіні T-Mobile-дың дивидендтерді төлей бастауына мүмкіндік беріп отыр. Алғашқы төлем 30 қарашаға дейін акцияларды сатып алған акционерлер үшін 2023 ж. 15 желтоқсанда жүргізілетін болады.

Төлем сомасы акцияға шаққанда $0,65-ті құрайды. Атап көрсетерлігі, бұл сома бәсекелес Verizon Communications Inc. (NYSE: VZ) компаниясының жақында ұлғайтқан дивидендтерімен сәйкес келеді. Бұл ретте T-Mobile дивидендтері тағы бір бәсекелес AT&T Inc. (NYSE: T) компаниясына қарағанда көп, ол акцияға шаққанда $0,52-ден төлейді.

Орнықты түсінікті бизнес пен дивидендтер ұзақ мерзімді инвесторлардың назарын TMUS-тың акцияларына аударта алады. Өткен тоқсанда T-Mobile-дың еің ірі инвесторы танымал ұзақ мерзімді инвестор Уоррен Баффеттің Berkshire Hathaway компаниясы болды.

22 қарашадағы сауда-саттықтарда TMUS акциясы $148,91-ге бағаланды.