Freedom Broker қаржылық қорытындыларды шығарады

2024 жылғы 20 мамыр, Алматы

«Фридом Финанс» АҚ-тың 2024 жылғы бірінші тоқсандағы нәтижелері*:

Активтер 2024 жылғы 31 наурыздағы жағдай бойынша 2023 жылғы 31 желтоқсанмен салыстырғанда 26,5 млрд теңгеге (8,4%) азайып, 290,5 млрд теңгені құрады. Бұған сауда портфеліндегі бағалы қағаздар көлемінің 26,6 млрд теңгеге немесе бұған дейін сатып алынған бағалы қағаздар бойынша оң нәтиже тіркелгеннен кейін 12,5%-ға төмендеуі себеп болып табылады.

Міндеттемелер 2023 жылғы 31 желтоқсанмен салыстырғанда 27,5 млрд теңгеге немесе 16,7%-ға азайды және тікелей РЕПО операциялары көлемінің 27,4 млрд теңгеге немесе 17%-ға қысқаруына байланысты 137,2 млрд теңгені құрады.

Меншікті капитал 2023 жылғы 31 желтоқсанмен салыстырғанда 957 млн теңгеге немесе 0,6%-ға өсіп, 153,2 млрд теңгені құрады.

2024 жылғы 31 наурызда аяқталған тоқсандағы таза пайда 2023 жылғы 31 наурызда аяқталған тоқсандағы таза пайдамен салыстырғанда 1,9 млрд теңгеге немесе 66,37%-ға қысқарып, 956,8 млн теңгені құрады. Бұл көрсетілетін андеррайтер қызметтерінен комиссиялық сыйақылар түріндегі кірістердің 832,9 млн теңгеге немесе 60%-ға; шетел валютасымен жасалатын операциялардан келіп түсетін кірістердің 130,8 млн теңгеге немесе 57%-ға азаюына, сондай-ақ қаржы активтерін сатып алу-сатудан болатын шығыстардың 1,2 млрд теңгеге немесе 81%-ға; басқа шығыстардың 369 млн теңгеге немесе 48,73%-ға ұлғаюына байланысты болып отыр.

Компанияның сауда портфелін тиімді басқару әділ құны бойынша бағаланатын қаржы активтері құнының 16,26%-ға өзгеруінен 827,2 млн теңгеге дейінгі таза кірістің өсуінен көрінеді.

2024 жылғы бірінші тоқсанның қорытындысы бойынша жарғылық капитал 98,5 млрд теңгені құрады.

2024 жылғы 1 сәуірдегі жағдай бойынша «Фридом Финанс» АҚ Қазақстан қор биржасында (KASE) саудаланатын бағалы қағаздардың 107 атауы бойынша, Astana International Exchange (AIX) биржасында саудаланатын бағалы қағаздардың 10 атауы бойынша ресми маркетмейкер болып табылады. Компанияның KASE мүшелері белсенділігінің рэнкингіндегі көшбасшылығы одан әрі сақталуда.

Ағымдағы жылғы бірінші тоқсанның қорытындысы бойынша «Фридом Финанс» АҚ нарықтың төрт секторында бірінші орынға жайғасты: үлестік, борыштық және мемлекеттік бағалы қағаздар, РЕПО. Есепті кезеңде KASE-дегі мәмілелердің жалпы санынан акционерлік қоғамның үлесі: акциялар 54,56%-ды (АҚШ долларымен), 12,36%-ды (теңгемен); мемлекеттік бағалы қағаздар 42,98%-ды (АҚШ долларымен), 1,29%-ды (теңгемен); корпоративтік облигациялар 28,61%-ды (АҚШ долларымен), 8,87%-ды (теңгемен) құрады. Компания 2024 жылғы қаңтар-наурыз айларында AIX-те жалпы үлесінен мәмілелер бойынша мынадай нәтижелерді көрсетті: акциялар 35,54%-ды (АҚШ долларымен), 26,86%-ды (теңгемен) және корпоративтік облигациялар 15,86%-ды (АҚШ долларымен), 48,53%-ды (теңгемен) құрады.

Freedom Finance Global 2024 фискалдық жылы** мынадай нәтижелер көрсетті:

Freedom Finance Global-дың активтері 2024 фискалдық жылғы қорытынды бойынша 224,4 млн АҚШ долларын құрады, көрсеткіш өсімі бір жыл ішінде 219%-ды құрады, бұл компанияның шоттарындағы ақша қаражаты мен оның баламаларының 126,9 млн АҚШ долларына немесе 523%-ға өсуіне, сондай-ақ сауда портфеліндегі бағалы қағаздар көлемінің 22,9 млн АҚШ долларына немесе 74%-ға ұлғаюына байланысты.

Міндеттемелер бір жыл бұрынғы ұқсас көрсеткішпен салыстырғанда тікелей РЕПО мәмілелері көлемінің 25,9 млн АҚШ долларына немесе 115%-ға ұлғаюына, сондай-ақ акционерге төленуге жарияланған дивидендтерге байланысты 168%-ға немесе 55,6 млн АҚШ долларына ұлғайып, 88,7 млн АҚШ долларын құрады.

2024 жылғы 31 наурыздағы жағдай бойынша меншікті капитал 135,7 млн АҚШ долларын құрады, есепті кезеңдегі бөлінбеген пайданың өсуі нәтижесінде бір жылда 265%-ға ұлғайды.

Есепті кезеңдегі жиынтық таза пайда 173,1 млн АҚШ долларын құрады, бұл бір жыл бұрынғы көрсеткішпен салыстырғанда 539%-ға өсуді көрсетті, бұл көбінесе пайыздық кірістің 245,8 млн АҚШ долларына немесе 665%-ға өсуімен байланысты.

2024 фискалдық жылы компанияда 75 мыңнан астам шот ашылды, 11 млн-нан астам мәміле жүргізілді. 2024 жылғы 1 сәуірдегі жағдай бойынша шоттардың жалпы саны 178 мыңнан асты, бағалы қағаздармен 20,1 млн-нан астам мәмілелер жүзеге асырылды.

2023 жылғы қазан айында «Астана» халықаралық қаржы орталығының қаржы қызметтерін реттеу комитеті (Astana Financial Services Authority, AFSA) Freedom Finance Global компаниясына Қазақстанда бөлшек инвесторлардың қор нарығында опциондармен сауда жасауға мүмкіндікті ұйымдастыру жөнінде пилоттық жобаны сеніп тапсыру туралы шешім қабылдады. 2024 жылғы қаңтарда компания бұл сервисті іске қосты.

2023 жылғы қараша айында AFSA Freedom Finance Global компаниясының реттелетін қызмет түрлерін жүзеге асыру лицензиясын кеңейтіп, оны ұжымдық инвестицияларды басқаруды жүзеге асыру лицензиясымен толықтырды (Managing a Collective Investment Scheme).

2023 жылғы желтоқсанда Freedom Finance Global компаниясы Қазақстанда бірінші болып АҚШ Ішкі кірістер қызметінің (Internal Revenue Service) уәкілетті салық агенті - Qualified Intermediary мәртебесін тұрақты міндетті сертификаттаудан өтті.

Air Astana-ның IPO-сы барысында Freedom Broker компаниясына жазылу кезеңінде (2024 жылғы 29 қаңтардан 6 ақпанға дейін) 131 млн АҚШ доллары көлемінде 7,8 мыңнан астам өтінім келіп түсіп, биржаларға берді. Бұл мәмілеге қазақстандық қатысушылар арасында ең үлкен көлем болып табылады және қазақстандық нарықтағы жалпы сұраныстың 27% үлесіне сәйкес келеді, ол 483 миллион АҚШ долларынан асып түсті. Өтінімдерді 7,5 мың бірегей клиент берді.

Freedom Broker компаниясының жалғыз акционері болып табылатын Freedom Holding Corp. (FRHC) компаниясы Директорлар кеңесінің Белиздегі Freedom Securities Trading Inc. (FSTB) (бұрынғы атауы FFIN Brokerage Services Inc) компаниясымен өзара әрекеттесуді тоқтату туралы шешіміне сәйкес, Freedom Finance Global-да қолданыстағы шоттары бар клиенттерді көшіру ойдағыдай жүргізілді. Сондай-ақ, FSTB компаниясының клиенттеріне FRHC брокерлік компанияларының біріне, оның ішінде Freedom Finance Global-ға көшуді дербес таңдау құқығы берілді.

AIX-тің биржааралық сауда-саттықты жүзеге асыру үшін Абу-Даби биржасы (ADX) құрған Tabadul цифрлық биржалық хабына қосылуы шеңберінде Freedom Finance Global компаниясы Қазақстанның атынан Tabadul Hub брокері ретінде танылып, қабылданды. Бұл ынтымақтастық өтімділікті арттырып, AIX және ADX биржаларында бағалы қағаздарға қол жетімділікті қамтамасыз ету арқылы инвесторлар үшін сауда тетіктерін жеңілдетеді.

Анықтама:

* 2024 жылғы 31 наурыздағы жағдай бойынша «Фридом Финанс» АҚ-тың жекелеген қаржылық есептілігіндегі (аудиттелмеген) негізгі қаржылық көрсеткіштер.

** Компания үшін 2024 жылғы төртінші тоқсан 2024 жылғы 31 наурызда аяқталды.

«Фридом Финанс» АҚ-тың өз клиенттеріне KASE және AIX биржаларында брокерлік қызмет көрсетеді, бағалы қағаздардың баға белгіленімдерін қолдау жөніндегі маркетмейкердің көрсетілетін қызметтерін, борыштық және үлестік қаржыландыруды ұйымдастыруды, қаржы консалтингі саласындағы қызметтерді ұсынады.

Freedom Finance Global - бөлшек инвесторларға қызмет көрсетуге маманданған жаңа мүмкіндіктері бар брокер. Компания АХҚО-да тіркелген, AFSA берген лицензиясы бар және ағылшын құқығының элементтері бар қызметті жүзеге асырады. Freedom Finance Global компаниясының клиенттері халықаралық қаржы нарықтарындағы биржалық операцияларға (NYSE/NASDAQ, London Stock Exchange, HKEX, Frankfurt Stock Exchange), KASE және AIX биржаларына, сондай-ақ холдингтің ең танымал және сұранысқа ие қызметі - бастапқы орналастыруларға қатысуға (IPO) тікелей қол жеткізе алады.

Компаниялар Freedom Holding Corp. халықаралық инвестициялық тобына кіреді. Холдингтің акциялары (2019 жылғы 15 қазаннан бастап) Nasdaq Capital Market-те FRHC тикерімен орналастырылды. Freedom Holding Corp. компаниясының қызметін Бағалы қағаздар және биржалар жөніндегі комиссия (SEC, АҚШ) реттейді.

БАҚ үшін байланыс деректері: 

Рамина Фахрутдинова – «Фридом Финанс» АҚ Директорлар кеңесі Төрағасының PR жөніндегі кеңесшісі