Microsoft өзінің қытайлық қызметкерлеріне жұмыс істеу үшін iPhone-ды пайдалануды және Android-тен бас тартуды ұйғаруда

Microsoft корпорациясы (MSFT) Қытайдағы қызметкерлеріне қыркүйек айынан бастап жұмыста iPhone-ды ғана пайдалана алатындарын хабарлады. Android құрылғыларын жұмыс орнында қолдануға іс жүзінде тыйым салынбақ.

Bloomberg News журналистері танысқан ішкі меморандумға сәйкес, көп ұзамай Microsoft-тың қытайлық қызметкерлері жүйеге кіру кезінде жеке басын растау үшін (Microsoft Authenticator пароль менеджері және Identity Pass бағдарламасы арқылы) Apple Inc (AAPL) құрылғыларын пайдалануға міндетті болады. Microsoft өнімдері мен қызметтерін хакерлерден қорғау бойынша жалпы корпоративтік күш-жігердің бір бөлігі болып табылатын бұл шара бүкіл материктік Қытай бойынша жүздеген жұмыскерлерді қозғайды

Microsoft Android базасындағы құрылғыларға өзінің корпоративтік ресурстарына қол жеткізуге тыйым салуды шешті, өйткені олар Қытайдағы Google мобильді қызметтеріне қосыла алмайды, делінген компанияның хабарламасында. Google Play ҚХР-да қолжетімді емес, демек Apple App Store - қытайлық қызметкерлер жеке тұлғаны сәйкестендіру үшін қажетті қосымшаларды жүктей алатын жалғыз ресурс.

Microsoft соңғы уақытта хакерлер тарапынан бірнеше рет шабуылға ұшырағаннан кейін бүкіл әлем бойынша қауіпсіздік шараларын күшейтуде. Операциялық қызмет сапасын арттыруды талап еткен америкалық сенаторлар тарапынан күшті қысым мен сын толқынына төтеп бере отырып, компания өткен жылдың қараша айында «Қауіпсіз болашақ бастамасы» (Secure Future Initiative) деп аталатын жалпы корпоративтік бастаманы іске қосты.

Қабылданған шешім сондай-ақ Қытайдағы Android қосымшалары дүкендерінің бөлшектеулі сипатын және қытайлық және шетелдік мобильдік экожүйелердің арасындағы айырмашылықтардың өсіп келе жатқанын көрсетеді. Қытайда Google мобильді қызметтері қолжетімсіз болғандықтан, Huawei Technologies Co. және Xiaomi Corp (XIACY) сияқты жергілікті смартфон өндірушілер өз платформаларын пайдаланады.

Дүйсенбі күні Нью-Йоркте Microsoft пен Apple баға белгілеулері бұл жаңалыққа ешқандай жауап бермеді. Alphabet Inc. (GOOG, GOOGL) бағасы 1% -ға төмендеді, ал Гонконгтағы Xiaomi қағаздары шамамен 1% -ға арзандады.

Microsoft әрекеті тағы да Бейжің мен Вашингтон арасындағы геосаяси шиеленістің артуы кезеңіндегі Қытайдағы iPhone құрылғыларына назар аударуы мүмкін. 2023 жылдан бастап Қытай үкіметі тарапынан қолдау тапқан фирмалар мен агенттіктер қызметкерлерді қауіпсіздік мәселелеріне сілтеме жасай отырып, шетелдік құрылғыларды пайдалануды тоқтатуға шақыруда. Мамыр айында Wall Street Journal хабарлағандай, Microsoft АҚШ үшін де, Қытай үшін де негізгі стратегиялық технология болып табылатын жасанды интеллект бойынша жұмыс істейтін 700-ден 800-ге дейінгі қызметкерлерді Қытайдан ауыстыруды ұсынды.